Қашқадарёда 2 та Nexia ва юк машинаси иштирокида ЙТҲ содир бўлди
Ҳодисага “Nexia-1” автомашинаси транспорт воситаларини нотўғри қувиб ўтиши сабаб бўлган.
Қашқадарё вилоятининг Кўкдала туманида йўл-транспорт ҳодисаси содир бўлди.
Вилоят Йўл ҳаракати хавфсизлиги бошқармаси матбуот хизматига кўра, ҳодиса жорий йил 24 май куни соат 14:20 ларда Қарши–Еттитом йўналишидаги Д-150 автомобиль йўлининг 13-километрида содир бўлган. Унда «Nexia-1», «Nexia-2» енгил автомобиллари ҳамда «КаmAZ» юк машинаси иштирок этган.
Тўқнашув оқибатида «Nexia-2» автомобилида бўлган бир нафар йўловчи тан жароҳати олиб, шифохонага ётқизилган. Қолган ҳайдовчи ва йўловчиларга ҳеч қанақа зарар етмаган.
Дастлабки суриштирув ҳаракатлари давомида «Nexia-1» автомашинаси транспорт воситаларини нотўғри қувиб ўтиши натижасида ушбу йўл-транспорт ҳодисаси содир бўлгани аниқланган.
Мазкур йўл-транспорт ҳодисаси юзасидан Қашқадарё вилояти ИИБ ЖХХ ЙҲХБ ходимлари томонидан белгиланган тартибда расмий ҳужжатлар расмийлаштирилган.
