Қашқадарёда чўкаётган болани қутқарган ФВВ ходими "Аъло хизматлари учун" кўкрак нишони билан тақдирланди
ФВВ ходими Ҳусниддин Шарапов воқеа қандай бўлганини сўзлаб берди.
Қашқадарё вилояти Китоб туманида дарёга чўкаётган 9 ёшли болани қутқариб қолган ФВВ ходими, майор Ҳусниддин Шарапов фавқулодда вазиятлар вазири томонидан “Аъло хизматлари учун” кўкрак нишони билан тақдирланди. Бу ҳақда ФВВ хабар қилди.
Ҳодиса ҳақида гапирган Ҳусниддин Шараповнинг айтишича, у ишдан келиб уйига кирган вақтда катта ўғли дарёда бола чўкаётганини айтган.
"Катта ўғлим югуриб келиб, “Дада, чопинг, дарёга бола чўкиб кетяпти”, деди. Шу заҳоти югуриб кетдим. Йўлдан бирор нарса синдириб олдим, тортиб оламан деб", — деди у.
"Ҳар бир эркак ҳам менинг ўрнимда бўлса, шу ишни қиларди. Келажаги нима бўлишидан қатъи назар… Шу югуриб келдим”, — дейди ФВВ ходими.
Шараповнинг сўзларига кўра, воқеа жойига етиб келганида икки нафар бола “укам чўкиб кетди” деб бақираётган бўлган. У аввал велосипедни сувга ташлаб, болани ушлаб қолишга уринган. Бироқ бола қаттиқ қўрқиб қолгани сабабли уни тутиб олиш имкони бўлмаган.
Шундан кейин ФВВ ходими ўзи сувга тушиб, болани тортиб чиққан. Қайд этилишича, бола ваҳима сабаб қутқарувчини сувга босган. Шу вақтда Шараповнинг акаси ва қўшниси ёрдамга келган.
"Аввал болани чиқариб юбордим. Кейин қишлоқ аҳлини огоҳлантириш мақсадида “болаларингизга қаранглар” деган маънода видео мурожаат ҳам қилдим. Боланинг кимлигини билмасдим. Кейин суриштириб, шу қишлоқдан эканини билдим. Уни уйига олиб бориб, иссиқ сув ичирдик, ювинтирдик ва адёлга ўраб, ота-онасига топширдик", — деди у.
