Ҳиндистонда жазирама оқибатида камида 16 киши ҳалок бўлди
Расмийларга кўра, ҳарорат 45 даражадан ҳам ошиши қайд этилмоқда.
Ҳиндистоннинг жанубидаги Телангана штатида кучли жазирама иссиқ оқибатида камида 16 киши иссиқ уриши сабабли вафот этди. Бу ҳақда штат Ахборот ва жамоатчилик билан алоқалар вазирлиги маълум қилди дейди ТАСС.
Расмийларга кўра, ҳудудда ҳарорат кескин кўтарилиб, 45 даражадан ҳам ошиши қайд этилмоқда. Шу муносабат билан штат ҳукумати фавқулодда йиғилиш ўтказиб, вазиятни муҳокама қилди ҳамда аҳоли учун огоҳлантириш эълон қилган.
Аҳолига, агар ўта зарурат бўлмаса, кундузги вақтда очиқ ҳавога чиқмаслик, иссиқдан сақланиш ҳамда тегишли эҳтиёт чораларига риоя қилиш тавсия этилган.
Ҳиндистон метеорология бошқармасининг аввалги огоҳлантиришига кўра, Жанубий Осиёнинг ушбу ҳудудида иссиқ тўлқини камида 26 майгача давом этиши кутилмоқда.
