Қирғизистонда Starlink расман ишга тушди

 

Қирғизистонда Starlink сунъий йўлдош интернет хизмати расман ишга тушди. 23 майдан бошлаб мамлакат SpaceX компаниясининг расмий хизмат харитасида «Мавжуд» ҳудуд сифатида белгиланган. Бу ҳақда Kaktus.media нашри хабар берди.

Эндиликда фойдаланувчилар Starlink'нинг расмий платформаси орқали ўз ҳудудларида хизмат мавжудлигини текшириши ҳамда интернет хизматига уланиш учун ариза топшириши мумкин. Шунингдек, тизим орқали мавжуд тариф режалари ва техник имкониятлар ҳақида маълумот олиш имконияти яратилган.

Қирғизистон ҳукумати аввалроқ Starlink лойиҳасини ишга тушириш жараёни якуний босқичга етганини маълум қилган эди. Вазирлар Маҳкамаси маълумотига кўра, лойиҳа учун барча зарур рухсатномалар олинган, SpaceX компанияси томонидан талаб этилган техник ва ҳуқуқий шартлар бажарилган ҳамда ваколатли давлат идоралари билан тегишли шартномалар имзоланган.

Расмийларнинг таъкидлашича, Starlink интернетининг жорий этилиши, айниқса, тоғли ва чекка ҳудудларда яшовчи аҳолини юқори тезликдаги интернет билан таъминлашда муҳим аҳамият касб этади. Бундан ташқари, мактаблар, тиббиёт муассасалари ва бошқа ижтимоий объектларни замонавий рақамли инфратузилмага улаш имкониятлари кенгаяди.

Starlink — SpaceX компанияси томонидан яратилган глобал сунъий йўлдош интернет тизими бўлиб, паст орбитали сунъий йўлдошлар тармоғи орқали интернет хизматини тақдим этади. Мазкур технология айниқса оптик толали ёки мобил алоқа инфратузилмаси ривожланмаган ҳудудлар учун самарали ечим сифатида кўрилмоқда.

Тармоқ ҳозирда дунёнинг 100 дан ортиқ давлатида фаолият юритмоқда. Марказий Осиёда эса Starlink интернетидан биринчи бўлиб Қозоғистон фойдалана бошлаган, ундан кейин Тожикистон ҳам ушбу тизимни жорий этган эди. Қирғизистон эса эндиликда ушбу технологиядан расман фойдаланаётган навбатдаги минтақа давлатига айланди.