Тошкентда солиқ инспекцияси ходимлари пора билан ушланди

 

Давлат хавфсизлик хизматининг Тошкент шаҳар бошқармаси ходимлари томонидан Иқтисодий жиноятларга қарши кураш департаменти билан ҳамкорликда ўтказилган тезкор тадбирда Тошкент шаҳрининг Бектемир туманида солиқ инспекцияси ходимларининг коррупция билан боғлиқ ноқонуний ҳаракатлари фош этилди. Бу ҳақда ДХХ Zamon.uz'гa маълум қилди.

Аниқланишича, Бектемир тумани солиқ инспекциясининг шўба бошлиғи маҳаллий тадбиркорга тегишли савдо дўконида харидорга савдо чеки берилмагани юзасидан мурожаат келиб тушганидан хабардор бўлган. Мансабдор шахс хизмат мавқеидан фойдаланган ҳолда ушбу ҳолат бўйича маъмурий баённома расмийлаштирмаслик ҳамда ишни судга юбормаслик эвазига 4 миллион сўм миқдорида пора талаб қилган.

Тезкор тадбир давомида у мазкур пул маблағини солиқ инспекцияси инспектори орқали олаётган вақтида ашёвий далиллар билан қўлга олинган.

Шунингдек, терговга қадар текширув ҳаракатлари давомида ушбу инспектор жорий йилнинг апрель ойида айнан шу дўконда бошқа бир харидорга савдо чеки берилмагани юзасидан келиб тушган мурожаатни кўриб чиқмаслик эвазига 1,5 миллион сўм олгани ҳам аниқланган.

Ҳозирда мазкур ҳолат юзасидан солиқ инспекцияси ходимларига нисбатан жиноят иши қўзғатилиб, тергов ҳаракатлари олиб борилмоқда.