Фарғона ва Наманган вилоятларида қарийб 2 млрд сўмдан ортиқ қийматдаги ноқонуний дорилар аниқланди

Фарғона ва Наманган вилоятларида катта миқдордаги ноқонуний дори воситалари аниқланди. Бу ҳақда ДХХ хабар берди.

 

Маълум қилинишича, аҳоли саломатлигини муҳофаза қилиш ҳамда сифати кафолатланмаган дори воситаларининг муомалага киритилишининг олдини олиш мақсадида Давлат хавфсизлик хизматининг Фарғона вилояти бўйича бошқармаси ходимлари Божхона органлари билан ҳамкорликда тезкор тадбир ўтказган.

 

Тадбир давомида Фарғона шаҳрида яшовчи 1987 йилда туғилган фуқаро “Газел” русумли юк автомобилида олиб келинган умумий қиймати 778 млн сўмлик, жами 38 турдаги 45 960 дона дори воситаларини ўз яшаш хонадонига тушираётган вақтида тўхтатиб қолинган. Ҳолат процессуал тартибда расмийлаштирилган.

 

Шунингдек, унинг хонадони кўздан кечирилганда 468 млн сўмлик 25 турдаги 16 535 дона дори воситалари меъёрий талабларга зид равишда сақланаётгани аниқланган.

 

Наманган вилоятида ҳам шунга ўхшаш ҳолат қайд этилди. Давлат хавфсизлик хизматининг Наманган вилояти бўйича бошқармаси ходимлари ИЖҚКД, Божхона органлари ҳамда “Фармацевтика маҳсулотлари хавфсизлиги маркази” ДМ билан ҳамкорликда ўтказилган тезкор тадбирда Наманган шаҳрида яшовчи 1995 ва 1993 йилларда туғилган икки нафар фуқаро ўз хонадонлари ҳамда Давлатобод туманидаги нотурар бинода хорижда ишлаб чиқарилган ва ноқонуний йўллар билан мамлакатга олиб кирилган дори воситаларини кейинчалик сотиш мақсадида сақлаб келгани аниқланган.

 

Кўздан кечириш жараёнида ушбу уч манзилдан тахминий қиймати 1 млрд сўмдан ортиқ бўлган жами 453 турдаги 32 528 қути дори воситалари белгиланган тартибда олиб қўйилган.

 

Ҳозирда ҳар икки ҳолат бўйича дори воситалари юзасидан экспертиза тайинланиб, суриштирув ишлари давом этмоқда.