Тошкент вилоятида сув насоси ичидан 1 кгга яқин синтетик гиёҳванд модда топилди
Ушбу шахс интернет орқали фаолият юритувчи наркодўконда “омборчи” вазифасида ишлаган.
Тошкент вилоятининг Зангиота туманида ўтказилган тезкор тадбир давомида сув насоси қурилмаси ичига яширилган синтетик гиёҳвандлик моддаси аниқланди. Бу ҳақда ДХХ Zamon.uz'га хабар берди.
Давлат хавфсизлик хизмати ҳамда Божхона органлари ходимлари ҳамкорлигида ўтказилган тадбирда аввалдан кузатувда бўлган, 1994 йилда Қорақалпоғистонда туғилган фуқаро қўлга олинган. Ундан хориждан юборилган сув насоси қурилмаси тегишли тартибда олиб қўйилган.
Қурилма холислар иштирокида текширилганда, унинг ичига қарийб 968 грамм “Альфа ПВП” синтетик гиёҳвандлик воситаси яширилгани маълум бўлган.
Шунингдек, тезкор тадбир давомида фуқаронинг Тошкент шаҳри Янгиҳаёт туманида ижарада яшаб келган хонадони ҳам кўздан кечирилган. Ундан наркотик моддаларни ўлчаш ва қадоқлашда фойдаланилган 2 та электрон тарози, “зип” пакетлар ҳамда скотчлар топилиб, далилий ашё сифатида расмийлаштириб олинган.
Дастлабки маълумотларга кўра, ушбу шахс интернет орқали фаолият юритувчи наркодўконда “омборчи” вазифасида ишлаган.
Мазкур ҳолат юзасидан жиноят иши қўзғатилиб, тергов ҳаракатлари давом эттирилмоқда.
