АҚШ ва Эрон сулҳни яна 60 кунга узайтириши мумкин
Келишув АҚШ президенти Доналд Трампнинг якуний тасдиғидан ўтиши керак.
АҚШ ва Эрон ўртасида амалда бўлиб турган сулҳни яна 60 кунга узайтириш ҳамда урушни тўлиқ якунлаш бўйича музокараларни бошлаш юзасидан дастлабки келишувга эришилгани маълум қилинди. Бу ҳақда Al Jazeera хабар берди.
Расмий манбаларга кўра, келишув ҳали АҚШ президенти Доналд Трампнинг якуний тасдиғидан ўтиши керак. Агар меморандум тасдиқланса, бу икки давлат ўртасидаги бир неча ҳафтадан буён давом этаётган дипломатик тангликдан кейинги муҳим сиёсий қадам бўлиши мумкин.
Манбаларга кўра, меморандум доирасида 60 кун давомида Ҳормуз бўғозида кема қатнови чекланмаслиги ва транзит ҳаракатлари бепул амалга оширилиши белгиланган. Эрон эса 30 кун ичида бўғоз ҳудудида жойлаштирилган барча денгиз миналарини олиб ташлаши керак бўлади.
Ҳужжатда Эроннинг ядро қуролига эга бўлишга уринмаслик мажбурияти ҳам қайд этилган. Битим амал қиладиган даврда Эроннинг юқори даражада бойитилган уран захиралари тақдири ҳамда мамлакатда уранни бойитиш фаолияти бўйича қўшимча музокаралар ўтказилиши режалаштирилган.
Бундан ташқари, меморандумга Исроил ва Ливандаги “Ҳизбуллоҳ” ҳаракати ўртасидаги урушни тўхтатиш бўйича банд ҳам киритилган.
Аввалроқ Форс кўрфази ҳудудида АҚШ ва Эрон ўртасида бир неча бор чекланган ҳарбий тўқнашувлар кузатилган, бу эса сулҳнинг бузилиши эҳтимоли ҳақида хавотирларни кучайтирганди.
