Эронда Али Хоманаийнинг дафн маросимига тайёргарлик бошланди
Уруш сабаб бир неча ойга кечиктирилган маросим санаси ҳозирча эълон қилинмаган.
Эрон ҳукумати ҳалок бўлган олий раҳбар Оятуллоҳ Али Хоманаий учун “улуғвор” дафн маросимини ўтказиш бўйича тайёргарлик ишларини бошлади. Ал-Арабия ёзишича, бу ҳақда давлат телевидениеси Ислом тарғиботи бўйича Теҳрон мувофиқлаштириш кенгаши раҳбари Моҳсен Маҳмудийга таяниб хабар берди.
Маҳмудийнинг сўзларига кўра, дафн маросимини ташкил этиш учун махсус штаб тузилган бўлиб, ҳозирда турли давлат идоралари маросимни режалаштириш ва ташкилий масалаларни мувофиқлаштириш билан шуғулланмоқда. Маросимнинг аниқ санаси ҳозирча маълум қилинмаган.
Али Хоманаий Эрон Ислом Республикасига 30 йилдан ортиқ раҳбарлик қилган. У 28 февраль куни АҚШ ва Исроил томонидан амалга оширилган ҳамда уруш бошланишига сабаб бўлган зарбаларнинг илк тўлқинида ҳалок бўлган эди.
Ҳужумлар вақтида унинг ўғли ва вориси Мужтабо Хоманаий ҳам яраланган. У олий раҳбар лавозимини эгаллаганидан буён омма олдида кўриниш бермаган.
Апрель ойида Али Хоманаий хотирасига бағишланган алоҳида тадбир ўтказилган бўлса-да, дастлаб режалаштирилган давлат дафн маросими уруш туфайли ўтказилмаган.
Давлат телевидениесининг хабар беришича, ҳозирда турли ташкилотлар маросимни юқори савияда ташкил этиш учун зарур шароитларни яратиш устида ишламоқда. Расмий эълон берилгач, маросим кенг кўламда ўтказилиши ва унда кўплаб фуқаролар иштирок этиши кутилмоқда.
Аввалроқ, АҚШ ва Эрон ўртасида амалда бўлиб турган сулҳни яна 60 кунга узайтириш ҳамда урушни тўлиқ якунлаш бўйича музокараларни бошлаш юзасидан дастлабки келишувга эришилгани маълум қилинганди.
