AQSh va Eron sulhni yana 60 kunga uzaytirishi mumkin
Kelishuv AQSh prezidenti Donald Trampning yakuniy tasdig‘idan o‘tishi kerak.
AQSh va Eron o‘rtasida amalda bo‘lib turgan sulhni yana 60 kunga uzaytirish hamda urushni to‘liq yakunlash bo‘yicha muzokaralarni boshlash yuzasidan dastlabki kelishuvga erishilgani ma’lum qilindi. Bu haqda Al Jazeera xabar berdi.
Rasmiy manbalarga ko‘ra, kelishuv hali AQSh prezidenti Donald Trampning yakuniy tasdig‘idan o‘tishi kerak. Agar memorandum tasdiqlansa, bu ikki davlat o‘rtasidagi bir necha haftadan buyon davom etayotgan diplomatik tanglikdan keyingi muhim siyosiy qadam bo‘lishi mumkin.
Manbalarga ko‘ra, memorandum doirasida 60 kun davomida Hormuz bo‘g‘ozida kema qatnovi cheklanmasligi va tranzit harakatlari bepul amalga oshirilishi belgilangan. Eron esa 30 kun ichida bo‘g‘oz hududida joylashtirilgan barcha dengiz minalarini olib tashlashi kerak bo‘ladi.
Hujjatda Eronning yadro quroliga ega bo‘lishga urinmaslik majburiyati ham qayd etilgan. Bitim amal qiladigan davrda Eronning yuqori darajada boyitilgan uran zaxiralari taqdiri hamda mamlakatda uranni boyitish faoliyati bo‘yicha qo‘shimcha muzokaralar o‘tkazilishi rejalashtirilgan.
Bundan tashqari, memorandumga Isroil va Livandagi “Hizbulloh” harakati o‘rtasidagi urushni to‘xtatish bo‘yicha band ham kiritilgan.
Avvalroq Fors ko‘rfazi hududida AQSh va Eron o‘rtasida bir necha bor cheklangan harbiy to‘qnashuvlar kuzatilgan, bu esa sulhning buzilishi ehtimoli haqida xavotirlarni kuchaytirgandi.
