Сергели автомобиль бозорида 100 нафар олиб-сотарнинг фаолиятига чек қўйилди

Тошкент шаҳридаги Сергели автомобиль ва эҳтиёт қисмлар бозорида ўтказилган профилактик тадбирлар давомида 100 нафар ноқонуний воситачи фаолиятига чек қўйилди. Бу ҳақда Тошкент шаҳар ИИББ хабар берди.

 

Маълум қилинишича, халқ орасида “сайгак” ёки “олиб-сотар” деб аталувчи шахслар харидорларга эҳтиёт қисмларни арзон нархда ва тезкор тарзда топиб беришни ваъда қилган, бироқ амалда маҳсулотларни бозор нархидан икки-уч баравар қимматга сотиб келган.

 

ИИББга кўра, бундай воситачилар фаолияти сифатсиз маҳсулотлар савдосининг кўпайишига, нархларнинг сунъий ошишига ҳамда харидорларнинг бозорга бўлган ишончи пасайишига сабаб бўлмоқда.

 

Ўтказилган рейдлар давомида бозорда ноқонуний фаолият юритаётган ва воситачилик билан шуғулланаётган 100 нафар шахс аниқланиб, улар туман ички ишлар органларига олиб борилган. Улардан 50 нафари билан профилактик суҳбат ўтказилган, 30 нафарига нисбатан эса маъмурий қамоқ ва жарима жазолари қўлланилган.

 

ИИББ маълумотларига кўра, 2025 йил ва 2026 йилнинг ўтган даври давомида мазкур бозор ҳудудида ноқонуний ҳаракатлар билан боғлиқ қарийб 10 та жиноят иши аниқланган.

 

Хусусан, 2026 йил январь ойида фуқароларга арзон автомобиль олиб беришни ваъда қилиб, уларнинг маблағларини ўзлаштирган икки шахсга нисбатан суд ҳукми чиқарилган. Суд қарори билан фуқаро Тожибоев Жиноят кодексининг 168-моддаси 4-қисми “а” банди (жуда кўп миқдордаги фирибгарлик) билан айбдор деб топилиб, 9 йил муддатга озодликдан маҳрум этилган. Худди шу модда билан айбланган фуқаро Шерқобилов эса 8 йилга қамалган.

 

ИИББнинг қайд этишича, тадбирлардан сўнг бозордаги вазият яхшилангани, харидорлар ва тадбиркорлар томонидан савдо жараёнларида очиқлик ва шаффофлик кучайгани таъкидланган.

 

Ички ишлар органлари фуқароларга маҳсулот ва хизматларни фақат расмий ҳамда ишончли савдо нуқталари орқали харид қилишни тавсия этди.