Сурхондарёда маст ҳолда тез ёрдам машинасини бошқарган ҳайдовчи 16 млн сўм жаримага тортилди
Шунингдек, у 3 йил муддатга транспорт воситаларини бошқариш ҳуқуқидан маҳрум этилди.
Сурхондарё вилояти Ангор туманида тез ёрдам хизматида ишловчи ҳайдовчининг маст ҳолда хизмат автомобилини бошқаргани аниқланиб, унга нисбатан суд қарори чиқарилди. Бу ҳақда Сурхондарё ИИБ хабар берди.
Маълум қилинишича, туман тиббиёт бирлашмасида ҳайдовчи бўлиб ишлаган 62 ёшли фуқаро 14 май куни соат 21:10 атрофида ўзига бириктирилган Damas русумли хизмат автомобилини спиртли ичимлик таъсирида бошқарган.
Ўтказилган текширувда ҳайдовчи алкотестер ёрдамида кўрикдан ўтказилган. Натижада унинг организмида 0,755 мг/л миқдорида алкоголь борлиги аниқланган.
Ҳолат юзасидан Маъмурий жавобгарлик тўғрисидаги кодекснинг 131-моддаси асосида баённома расмийлаштирилиб, иш судга юборилган.
Жиноят ишлари бўйича Ангор туман суди ҳайдовчини айбдор деб топди. Суд қарорига кўра, у 3 йил муддатга транспорт воситаларини бошқариш ҳуқуқидан маҳрум этилди ҳамда базавий ҳисоблаш миқдорининг 40 баравари — 16 миллион 480 минг сўм миқдорида жаримага тортилди.
