Ўзбекистонда 4 кун давомида сел-сув тошқини хавфи эълон қилинди
Айрим ҳудудларда кучли ёмғир сабаб ёмғир сувлари тўпланиши ва ҳудудларни сув босиши эҳтимоли ҳам мавжудлиги қайд этилган.
«Ўзгидромет» 2–5 июнь кунлари республиканинг тоғолди ва тоғли ҳудудларида сел-сув тошқини хавфи юзага келиши мумкинлиги ҳақида огоҳлантирди.
Маълум қилинишича, кутилаётган ёмғирлар сабаб Қашқадарё, Сурхондарё, Самарқанд, Навоий, Жиззах, Тошкент, Наманган, Фарғона ва Андижон вилоятларининг айрим туманларида сел-сув тошқини ҳодисалари кузатилиши мумкин.
Хусусан, Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманлари, Сурхондарёнинг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ҳамда Музробот туманлари хавфли ҳудудлар қаторига киритилган.
Шунингдек, Самарқанд, Навоий, Жиззах, Тошкент, Наманган, Фарғона ва Андижон вилоятларининг қатор тоғолди ҳамда тоғли ҳудудларида ҳам сел келиши эҳтимоли мавжуд.
«Ўзгидромет» тоғолди ва тоғли ҳудудларда яшовчи фуқаролар, дам олувчилар ҳамда ушбу ҳудудларда ҳаракатланувчи ҳайдовчилардан эҳтиёт чораларини кўришни сўради.
Бундан ташқари, айрим ҳудудларда кучли ёмғир сабаб ёмғир сувлари тўпланиши ва ҳудудларни сув босиши эҳтимоли ҳам мавжудлиги қайд этилган.
