“Хатоларни расмий ўйинларда эмас, ўртоқлик учрашувларида қилиш яхши” — Фабио Каннаваро
Ўзбекистон терма жамоаси бош мураббийи жамоанинг ўйини ва ўйин натижаси ҳақида фикр билдирди.
Ўзбекистон миллий терма жамоаси бош мураббийи Фабио Каннаваро Канада терма жамоасига қарши ўртоқлик учрашувидан сўнг жамоа ўйини ва натижага изоҳ берди.
Эслатиб ўтамиз, мазкур баҳсда Ўзбекистон терма жамоаси 0:2 ҳисобида мағлуб бўлган эди.
Матбуот анжуманида сўзга чиққан мураббий ўйин давомида йўл қўйилган хатолар ва уларнинг сабаблари ҳақида тўхталган.
“Ҳар қандай ўйинда хатолар бўлади. Уларни ўн кундан кейинги расмий учрашувларда эмас, айнан шундай ўртоқлик ўйинларида қилиш яхшироқ. Бу футболнинг бир қисми”, — деган мураббий.
Унинг таъкидлашича, биринчи бўлимда жамоа тартибли ва агрессив ҳаракат қилган, иккинчи бўлимда эса темп пасайиб, тўп назорати йўқотилган.
“Иккинчи бўлимда тўпни кўпроқ назорат қилишни истадик, аммо шиддатни йўқотдик ва бир нечта хатоларга йўл қўйдик. Бундай даражадаги ўйинларда бундай хатолар жазосиз қолмайди”, — дея таъкидлаган Каннаваро.
Мураббий Канада терма жамоасини узоқ вақтдан бери кузатиб келилишини, жамоа сўнгги йилларда улар сезиларли даражада ўсганини билириб, терма жамоа ҳақида ҳам ижобий фикр билдирган.
Шунингдек, мураббий мухлислар қўллаб-қувватловини алоҳида эътироф этган:
“Об-ҳаво совуқ бўлишига қарамай, стадионга кўплаб мухлислар келди. Бундай қўллаб-қувватлаш остида ўйнаш жуда ёқимли. Уларнинг барчасига миннатдорчилик билдираман”.
2026 йилги жаҳон чемпионатидаги рақиблар ҳақида фикр билдирар экан, мураббий қуйидагиларни қайд этган:
“Португалия, Колумбия ва Конго Демократик Республикаси жуда кучли жамоалар. Биз учун бу тарихий имконият. Ютқазадиган ҳеч нарсамиз йўқ, фақат тажриба орттиришимиз керак”.
Мураббий, шунингдек, футболчи Абдуқодир Ҳусанов ҳақида ҳам алоҳида тўхталган:
“Ҳусанов жуда иқтидорли футболчи. Унинг салоҳияти юқори. У баъзан ҳаддан ташқари агрессив ҳаракат қилади, аммо вақт ўтиши билан янада етук футболчига айланади”, — дея таъкидлаган Каннаваро.
