Ўзбекистон Президенти амалий ташриф билан Россияда бўлади
Президент Шавкат Мирзиёев 4-5 июнь кунлари 29-Петербург халқаро иқтисодий форумининг ялпи йиғилишида иштирок этади.
Президент Шавкат Мирзиёев “Прагматик мулоқот – барқарор келажак сари йўл” шиори остида ўтадиган 29-Петербург халқаро иқтисодий форумининг ялпи йиғилишида иштирок этади ва нутқ сўзлайди. Бу ҳақда Президент матбуот хизмати хабар берди.
Ўзбекистон етакчиси жаҳон иқтисодиётидаги вазият, Ўзбекистон – Россия иқтисодий ҳамкорлигини ривожлантириш истиқболлари борасидаги фикрлари билан ўртоқлашади, шунингдек, мамлакатимизни ривожлантиришнинг бугунги устувор йўналишларига тўхталиб ўтади.
Ташриф дастурида Россия Федерацияси Президенти Владимир Путин билан учрашув ўтказиш ҳамда Ўзбекистонда биринчи интеграциялашган атом электр станцияси қурилишини бошлаш маросимида иштирок этиш кўзда тутилган.
