Санкт-Петербургда Шавкат Мирзиёев ва Владимир Путин учрашуви бўлиб ўтди
Жорий йил бошидан буён Ўзбекистон ва Россия ўртасидаги товар айирбошлаш ҳажми 20 фоизга ошгани қайд этилди.
Санкт-Петербург шаҳрига амалга оширилган амалий ташриф доирасида Шавкат Мирзиёев Россия Президенти Владимир Путин билан учрашув ўтказди.
Мулоқот чоғида Ўзбекистон ва Россия ўртасидаги кенг қамровли стратегик шериклик ҳамда иттифоқчилик муносабатларини янада ривожлантириш масалалари муҳокама қилинди.
Томонлар савдо-иқтисодий ҳамкорлик изчил ривожланиб бораётганини мамнуният билан қайд этдилар. Жорий йил бошидан буён ўзаро товар айирбошлаш ҳажми қарийб 20 фоизга ошгани таъкидланди.
Учрашувда саноат, энергетика, металлургия, транспорт, кимё саноати ва иқтисодиётнинг бошқа устувор тармоқларида амалга оширилаётган йирик қўшма лойиҳаларнинг бориши кўриб чиқилди. Савдо ҳажмларининг ўсиш суръатларини сақлаб қолиш, кооперация лойиҳаларини жадаллаштириш ҳамда ҳудудлараро ҳамкорликни янада фаоллаштириш муҳимлиги қайд этилди.
Маданий-гуманитар алоқаларни кенгайтириш масалаларига ҳам алоҳида эътибор қаратилди. Шу кунларда Мариинский театрида Георг Фридрих Генделнинг “Тамерлано” операси премераси бўлиб ўтгани ҳамда Эрмитаж давлат музейида Ўзбекистон амалий санъати кўргазмаси очилгани таъкидланди.
Шунингдек, давлат раҳбарлари яқин истиқболдаги олий ва юқори даражадаги тадбирлар режасини ҳам муҳокама қилдилар.
