Ҳиндистондаги меҳмонхона ёнғинида Ўзбекистон фуқароси ҳалок бўлди
Ҳиндистон Ташқи ишлар вазирлиги маълумотига кўра, Деҳлидаги ёнғинда 13 нафар хорижлик ҳалок бўлган, 20 дан ортиқ чет эл фуқароси жароҳат олган.
Ҳиндистон пойтахти Нъю-Деҳли шаҳрининг жанубий қисмида жойлашган меҳмонхонада юз берган йирик ёнғин оқибатида 21 киши ҳалок бўлган. Қурбонлар орасида бир нафар Ўзбекистон фуқароси ҳам бор. Бу ҳақда ТАСС Ҳиндистонда элчихонасига таяниб хабар берди.
Ҳиндистон Ташқи ишлар вазирлиги вакилининг маълум қилишича, ҳодиса оқибатида 13 нафар хорижий фуқаро вафот этган. Улар орасида Мозамбик, Нигерия, Қирғизистон, Ўзбекистон, Бангладеш, Либерия, Конго ва Ироқ фуқаролари бор.
Расмий маълумотларга кўра, ёнғин оқибатида 20 нафардан ортиқ хорижий фуқаро турли даражадаги тан жароҳатлари олган. Ҳиндистон Ташқи ишлар вазирлиги жабрланганлар ва ҳалок бўлганларнинг давлатлари элчихоналари билан ҳамкорликда зарур ёрдам кўрсатиш ишларини олиб бормоқда.
Вазирлик вакили маҳаллий ҳокимият органлари ҳамда тиббиёт муассасалари билан биргаликда ҳужжатларни расмийлаштириш ва жабрланганларга ёрдам кўрсатиш бўйича ишлар давом этаётганини билдирган.
Ҳодиса 3 июн куни эрталаб содир бўлган. Қутқарув хизматлари томонидан 47 киши хавфсиз ҳудудга олиб чиқилган. Ёнғин сабаблари юзасидан тергов ҳаракатлари олиб борилмоқда.
Дастлабки маълумотларга кўра, меҳмонхона эгаси ҳуқуқ-тартибот органлари томонидан қўлга олинган. Ҳозирда воқеанинг барча тафсилотлари ўрганилмоқда.
Аввалроқ Ҳиндистондаги Ўзбекистон элчихонаси ушбу йирик ёнғинда қурбонлар ёки жароҳатланганлар орасида Ўзбекистон фуқаролари йўқлигини маълум қилган эди. Бироқ, кейинчалик Ҳиндистон томонидан янгиланган маълумотлар тақдим этилди.
