Жиззахда ҳаракатланаётган юк машинаси ёниб кетди
Ҳозирда ёнғин сабаби ва зарари аниқланмоқда.
Бугун, 6 июн куни Жиззах вилоятининг Ғаллаорол туманида ҳаракатланиб кетаётган юк автомобилида ёнғин содир бўлди.
Вилоят Фавқулодда вазиятлар бошқармаси маълумотига кўра, ҳодиса соат 06:39 да М-39 халқаро автомобил йўлининг Ғаллаорол тумани “Хонимқўрғон” маҳалла фуқаролар йиғини ҳудудидан ўтувчи 1027-километрида қайд этилган. Самарқанд–Тошкент йўналишида ҳаракатланаётган юк автомобили техник носозлик ёки бошқа сабаблар оқибатида ёниб кетган.
Воқеа жойига 2 та ёнғин-қутқарув экипажи жалб этилиб, улар соат 07:10 да етиб борган. Тезкор ҳаракатлар натижасида ёнғин соат 07:48 да тўлиқ бартараф этилган.
Дастлабки маълумотларга кўра, ҳодиса оқибатида тан жароҳати олганлар йўқ. Ҳозирда ёнғиннинг келиб чиқиш сабаблари ҳамда етказилган моддий зарар миқдори аниқланмоқда.
Эслатиб ўтамиз, аввалроқ Тошкент вилоятида кондиционер ортилган юк машинаси ёниб кетгани хабар қилинган эди.
