Самарқандда 14 ёшли қизни босиб кетган ҳайдовчи 6 йилга қамалди

Самарқанд шаҳрида 14 ёшли қизнинг ўлими билан боғлиқ йўл-транспорт ҳодисаси бўйича суд ҳукми эълон қилинди. Бу ҳақда “Zamon” дастурида маълум қилинди.

 

Маълумотларга кўра, ҳодиса жорий йилнинг 10 февраль куни соат 14:15 атрофида Самарқанд шаҳридаги Темирйўлчилар маҳалласида содир бўлган. Вояга етмаган қиз укаси билан велосипед учиш учун маҳалла ички йўлига чиққан.

 

Қайд этилишича, қиз велосипед бошқарувини йўқотиб, йўл четида тўхтаб турган автомобилга урилган ва қатнов қисмига йиқилган. Шундан сўнг шу йўналишда ҳаракатланиб келаётган юк машинаси уни босиб кетган. Оқибатда қиз оғир тан жароҳатлари туфайли воқеа жойида вафот этган.

 

Мазкур жиноят иши Самарқанд шаҳар жиноят ишлари бўйича судида кўриб чиқилган. Суд тергови давомида 26 ёшли ҳайдовчи аввал ҳам йўл ҳаракати қоидаларини бузиш билан боғлиқ жиноят учун жавобгарликка тортилгани аниқланган.

 

Шунингдек, ҳодиса содир бўлган ҳудудда юк автомобиллари ҳаракати тақиқланган бўлишига қарамай, ҳайдовчи ушбу йўлдан фойдалангани маълум бўлган. Судда эълон қилинган хулосага кўра, ҳайдовчида транспорт воситасини тўхтатиб қолиш учун техник имконият мавжуд бўлган.

 

Суд ҳукмига биноан, ҳайдовчи Жиноят кодексининг 266-моддаси 2-қисми — транспорт воситалари ҳаракати ёки улардан фойдаланиш хавфсизлиги қоидаларини бузиб, одам ўлимига сабаб бўлишда айбдор деб топилган.

 

Унга 6 йил муддатга озодликдан маҳрум қилиш ҳамда 3 йил давомида транспорт воситаларини бошқариш ҳуқуқидан маҳрум этиш жазоси тайинланди.

 

Бундан ташқари, суд қарори билан судланувчидан жабрланувчи томон фойдасига 20 миллион сўм моддий ва 120 миллион сўм маънавий зарар ундирилиши белгиланди.