Сурхондарёда 4 минг долларга ИЖҚКДга ишга киритиб қўйишни ваъда қилган шахс ушланди
У юқори лавозимларда ишловчи танишлари орқали фуқарони ишга жойламоқчи бўлган.
Сурхондарё вилоятида фуқарони Бош прокуратура ҳузуридаги Иқтисодий жиноятларга қарши курашиш департаментига ишга жойлаштириб қўйишни ваъда қилиб, пул олган шахс қўлга олинди. Бу ҳақда ИЖҚКД хабар берди.
Бош прокуратура ҳузуридаги Департаментнинг Шахсий хавфсизлик бошқармаси ҳамда Сурхондарё вилояти бошқармаси ходимлари ҳамкорлигида ўтказилган тезкор тадбирда фуқаро Б.Л.нинг ноқонуний ҳаракатларига чек қўйилди.
Терговга қадар текширув материалларига кўра, у фуқаро С.Н.га юқори лавозимларда ишловчи танишлари орқали уни Бош прокуратура ҳузуридаги Иқтисодий жиноятларга қарши курашиш департаментига ишга киритиб қўйишни ваъда қилган. Бунинг эвазига 4 минг АҚШ доллари талаб қилган.
Тезкор тадбир давомида Б.Л. келишилган пуллар ҳисобидан 48 миллион сўмни олаётган вақтида ашёвий далиллар билан ушланган.
Мазкур ҳолат юзасидан Жиноят кодексининг тегишли моддалари асосида жиноят иши қўзғатилиб, дастлабки тергов ҳаракатлари олиб борилмоқда.
