Қаршида газ “заправка”портлади
Портлашдан сўнг юзага келган ёнғинни ўчириш ишлари олиб борилмоқда.
Қашқадарё вилоятининг Қарши туманида жойлашган маиший газ баллонларига суюлтирилган газ қуйиш шохобчасида портлаш содир бўлди. Бу ҳақда Фавқулодда вазиятлар вазирлиги маълум қилди.
Дастлабки маълумотларга кўра, ҳодиса 8 июн куни соат 13:50 атрофида Қарши тумани “Чаман” маҳалла фуқаролар йиғини ҳудудида жойлашган газ қуйиш шохобчасида юз берган.
Хабар келиб тушиши билан воқеа жойига Фавқулодда вазиятлар вазирлигининг қутқарув бўлинмалари жалб этилган. Ҳозирда портлаш оқибатида юзага келган ёнғинни бартараф этиш ва вазиятни тўлиқ назоратга олиш ишлари олиб борилмоқда.
Масъул хизматлар томонидан ҳодисанинг сабаблари ва оқибатларига аниқлик киритилмоқда. Воқеа юзасидан қўшимча маълумотлар кейинроқ эълон қилиниши кутилмоқда.
Эслатиб ўтамиз, аввалроқ Деновда газ заправкада портлаш содир бўлгани ҳақида хабар берилган эди.
