Сергели автомобиль бозорида ноқонуний савдо билан шуғулланган шахсларнинг суратлари илиб қўйилди
Ушбу бозорда 100 нафар “сайгак”нинг фаолиятига чек қўйилганди.
Сергели автомобиль бозори ҳудудида огоҳлантирувчи стенд ўрнатилиб, унга ноқонуний савдо билан шуғуллангани айтилаётган 40 нафар шахснинг фотосурати жойлаштирилди. Улардан 39 нафари эркак, 1 нафари аёл киши. Ҳар бир сурат тагида фуқаронинг исм-фамилияси ва туғилган йили аниқ кўрсатилган.
Бозор маъмурияти харидор ва сотувчиларни ушбу шахсларга алданиб қолмасликка чақирмоқда.
Аввалроқ, ушбу бозорда 100 нафар “сайгак”нинг фаолиятига чек қўйилганди.
ИИББга кўра, бундай воситачилар фаолияти сифатсиз маҳсулотлар савдосининг кўпайишига, нархларнинг сунъий ошишига ҳамда харидорларнинг бозорга бўлган ишончи пасайишига сабаб бўлмоқда.
Шунингдек, 2025 йил ва 2026 йилнинг ўтган даври давомида мазкур бозор ҳудудида ноқонуний ҳаракатлар билан боғлиқ қарийб 10 та жиноят иши аниқланган.
