Тошкентда солиқ инспекцияси ходимларига нисбатан жиноят иши қўзғатилди
2 нафар инспектор тадбиркордан ноқонуний тарзда савдо дўконини ижарага олишда ёрдам бериш эвазига 5 минг АҚШ доллари талаб қилган.
Давлат хавфсизлик хизмати ҳамда Иқтисодий жиноятларга қарши курашиш департаменти ходимлари ҳамкорлигида тезкор тадбир давомида Юнусобод тумани Солиқ инспекциясида фаолият юритган 2 нафар инспектор ўзаро тил бириктирган ҳолда хизмат мавқеидан фойдаланиб, тадбиркорга “Чилонзор буюм бозори комплекси” АЖдан 3 та савдо дўконини ижарага олишда ёрдам беришни ваъда қилгани аниқланган. Бу ҳақда ДХХ Zamon.uz'га хабар берди.
Улар, шунингдек, ўз танишлари орқали тадбиркорга тегишли МЧЖни очиқ савдо тендерида ғолиб бўлишини таъминлаш ҳамда дўконларни ижарага олиш бўйича шартномаларни расмийлаштириб бериш эвазига 5 минг АҚШ доллари талаб қилган.
Ўтказилган тезкор тадбир давомида солиқ инспекторлари сўралган пул маблағини олган вақтида ашёвий далиллар билан қўлга олинган.
Ҳозирда мазкур шахсларга нисбатан жиноят иши қўзғатилиб, тергов ҳаракатлари олиб борилмоқда.
Аввалроқ, Бектемир тумани солиқ инспекциясининг шўба бошлиғи маҳаллий тадбиркорга тегишли савдо дўконида харидорга савдо чеки берилмагани юзасидан кеиб тушган мурожаат юзасидан маъмурий баённома расмийлаштирмаслик ҳамда ишни судга юбормаслик эвазига 4 миллион сўм пора талаб қилгани хабар қилинган эди.
