Ўзбекистонда терроризмни молиялаштиришда айбланиб, 8 киши қамалди
Улар юборган пуллар Фаластиндаги жабр кўрганларга эмас, Суриядаги террористик гуруҳлар эҳтиёжи учун сарфлангани аниқланган.
Давлат хавфсизлик хизмати ва ички ишлар органлари ҳамкорлигида ўтказилган тезкор тадбирлар давомида терроризмни молиялаштириш билан шуғулланган бир гуруҳ шахсларнинг ноқонуний фаолиятига чек қўйилди. Бу ҳақда ДХХ хабар берди.
Маълум қилинишича, Тошкент шаҳри ҳамда Самарқанд, Бухоро, Андижон ва Фарғона вилоятларида яшовчи, 1987–1998 йилларда туғилган 8 нафар фуқаро Сурияда фаолият юритувчи “Ғуроба катибаси” террористик ташкилотининг медиа-блогери, Қирғизистон фуқароси Абдулмуҳсин Усмонов таъсирига тушиб, унинг назоратидаги ҳисоб-рақамларга пул маблағлари ўтказиб келган.
Тергов материалларига кўра, “Саад Мухтор” тахаллуси билан танилган Абдулмуҳсин Усмонов “Телеграм” мессенжери орқали Фаластинда жабрланган мусулмонларга ёрдам кўрсатиш баҳонасида хайрия маблағларини йиққан.
Бироқ тўпланган маблағлар Суриядаги террористик гуруҳлар эҳтиёжлари учун сарфлангани аниқланган.
Суд ҳукмига кўра, ушбу жиноятга алоқадор деб топилган 7 нафар шахс 3 йилдан 8 йилгача муддатга озодликдан маҳрум этилди. Яна бир нафар судланувчига эса 4 йил 4 ой муддатга озодликни чеклаш жазоси тайинланди.
Жиноят Кодексининг 155-3-моддасига кўра, терроризмни молиялаштириш 15 йилгача озодликдан маҳрум қилиш билан жазоланади.
