Барча ўзбекистонликларнинг биз билан фахрланишини истаймиз — Фабио Каннаваро
Италиялик мутахассис мундиал олдидан ўз фикрлари билан ўртоқлашди.
2026 йил 10 июнь куни Ўзбекистон миллий терма жамоаси Жаҳон чемпионати вақтида ўз қароргоҳи бўладиган АҚШнинг Атланта шаҳрига етиб келди. Жамоа бош мураббийи Фабио Каннаваро мундиалда иштирок этиш ҳар бир футболчи учун алоҳида аҳамиятга эга эканини таъкидлади.
“Жаҳон чемпионатида қатнашиш — ҳар бир футболчининг энг катта орзуларидан бири. Биз майдонда бор кучимизни берамиз, ҳар бир баҳсда охирги сониягача курашамиз. Мақсадимиз — нафақат яхши натижа кўрсатиш, балки дунёнинг қаерида бўлишидан қатъи назар, барча ўзбекистонликларнинг биз билан фахрланишига эришиш", — деди Каннаваро.
Маълумот ўрнида, Ўзбекистон миллий терма жамоаси мундиалдаги илк юришини 18 июнь куни Колумбия миллий терма жамоасига қарши ўтказади.
Эслатиб ўтамиз, аввалроқ терма жамоа етакчиси Жалолиддин Машарипов жароҳат сабаб Жаҳон чемпионатини ўтказиб юбориши мумкинлиги ҳақида хабар берилганди.
