Самарқанд ва Наманганда профилактика инспекторлари пора билан ушланди
Бир инспектор собиқ ИИБ ходимини ишга тиклашни ваъда қилган, бошқа бири эса фуқарога нисбатан аризани кўриб чиқмаган ва ноқонуний фаолиятига кўмаклашмоқчи бўлган.
Самарқанд ва Наманганда икки профилактика инспектори коррупцияда гумонланиб қўлга олинди. Бу ҳақда ДХХ хабар берди.
Маълум қилинишича, Самарқанд шаҳар ИИО ФМБ профилактика инспектори мансабдор танишлари орқали собиқ ички ишлар органи ходимини тизимга қайта ишга тиклашда ёрдам беришни ваъда қилиб, бунинг эвазига 7 минг АҚШ доллари олган вақтида ашёвий далиллар билан ушланган.
Мазкур ҳолат юзасидан унга нисбатан Жиноят кодексининг 168 ва 211-моддалари билан жиноят иши қўзғатилиб, тергов ҳаракатлари олиб борилмоқда.
Яна бир ҳолатда Наманган вилоятининг Чуст тумани ИИБ профилактика инспектори 1994 йилда туғилган фуқарога нисбатан келиб тушган аризани кўриб чиқмасдан қолдирганини рўкач қилиб, ундан 2 минг АҚШ доллари талаб қилгани аниқланган. У жорий йил февраль ойида ушбу маблағнинг 700 долларини олган.
Тергов маълумотларига кўра, инспектор ноқонуний ҳаракатларини давом эттириб, фуқародан қолган 1300 долларни ҳамда келгусида уни Ўзбекистон–Қирғизистон давлат чегараси орқали чорва молларини ноқонуний олиб ўтишда қўллаб-қувватлаш эвазига яна 2 минг доллар талаб қилган. Шу тариқа у жами 3300 АҚШ доллари олишни кўзлаган.
Давлат хавфсизлик хизмати, Бош прокуратура ҳузуридаги Департамент ҳамда ИИВ Шахсий хавфсизлик бош бошқармаси ходимлари ҳамкорлигида ўтказилган тезкор тадбирда профилактика инспектори сўралган пул маблағларини олаётган вақтида ушланди.
Мазкур ҳолат бўйича унга нисбатан Жиноят кодексининг 165 ва 168-моддалари билан жиноят иши қўзғатилган. Ҳозирда тергов ҳаракатлари давом эттирилмоқда.
