Али Хоманаий 9 июл куни Машҳадда дафн этилади
4–9 июл кунлари Теҳрон, Қум ва Машҳадда Хоманаий билан видолашув маросимлари ўтказилади.
Эрон давлат оммавий ахборот воситалари мамлакат собиқ олий раҳбари Али Хоманаийнинг дафн маросими ва видолашув тадбирлари ўтказиладиган саналар ҳамда жойлар бўйича расмий маълумотларни эълон қилди деб хабар беради Reuters.
Унга кўра, видолашув маросимлари 4–5 июл кунлари Теҳрон шаҳрида, Имом Хомейни номидаги масжидда бошланади. Бу босқичда марҳум билан расмий хайрлашув тадбирлари ўтказилади.
Кейинги маросим 7 июл куни Қум шаҳрида ташкил этилади. Ушбу босқичда ҳам кенг жамоатчилик ва расмийлар иштирокида видолашув тадбирлари давом эттирилади.
Якуний дафн маросими эса 9 июл куни Машҳад шаҳрида бўлиб ўтади. Марҳумнинг жасади Машҳаддаги Имом Ризо зиёратгоҳида дафн этилиши режалаштирилган.
Расмий маълумотларда таъкидланишича, маросимлар кетма-кетлиги 4–9 июл кунлари оралиғида учта шаҳарда ўтказилади ҳамда ҳар бир босқич белгиланган тартибда ташкил этилади.
Эслатиб ўтамиз, Али Хоманаий 2026 йил 28 феврал куни Теҳронга уюштирилган ҳаво ҳужумлари оқибатида ҳалок бўлган эди. Унинг вафотидан сўнг мамлакатдаги хавфсизлик вазияти ҳамда давом этаётган ҳарбий ҳаракатлар сабаб видолашув маросимлари ўтказилмаган. Эрон расмийлари маросимларни ташкил этиш учун зарур инфратузилма ва хавфсизлик чораларини тайёрлаш мақсадида тадбирларни кейинга қолдирган эди.
