Фарғонада талабанинг ўлимига сабаб бўлган мотоцикл ҳайдовчисига ҳукм ўқилди
Ҳайдовчи қизил чироқда тўхтамасдан, йўлни кесиб ўтаётган пиёдани уриб юборган.
Фарғона шаҳрида светофорнинг тақиқловчи ишорасига амал қилмай пиёдани уриб юборган мотоцикл ҳайдовчисига нисбатан суд ҳукми эълон қилинди. Бу ҳақда Йўл ҳаракати хавфсизлиги хизмати маълум қилди.
Маълумотларга кўра, йўл-транспорт ҳодисаси Фарғона шаҳри “Жўйдам” маҳалласи ҳудудидан ўтувчи Фарғона кўчасида соат 19:30 атрофида содир бўлган.
29 ёшли ҳайдовчи тегишли тоифадаги ҳайдовчилик гувоҳномаси, давлат рақам белгиси ва техник паспорти бўлмаган мотоциклни бошқариб кетаётганда светофорнинг қизил чироғига амал қилмай, йўлни кесиб ўтаётган пиёдани уриб юборган.
Ҳодиса оқибатида пиёда олган тан жароҳатларидан вафот этган. Марҳум Риштон туманида туғилган бўлиб, Фарғона шаҳридаги олий таълим муассасаларидан бирида таҳсил олаётган талаба бўлган.
Мазкур ҳолат Жиноят ишлари бўйича Фарғона шаҳар судида кўриб чиқилди. Суд жараёнида айбланувчи мотоциклни тўрт ой давомида ҳужжатларсиз бошқариб келганини тан олган. Шунингдек, у йўл-транспорт ҳодисаси вақтида ўзи ҳам тан жароҳати олгани сабабли воқеа тафсилотларини эслай олмаслигини билдирган.
Суд ҳукмига кўра, айбланувчи 3 йил муддатга барча турдаги транспорт воситаларини бошқариш ҳуқуқидан маҳрум қилиниб, 5 йил муддатга озодликдан маҳрум этилди. Бундан ташқари, ундан жабрланувчининг қонуний вакили фойдасига 44 миллион сўм моддий ва 100 миллион сўм маънавий зарар ундирилиши белгиланди.
