Ҳормуз бўғозидан ўтиш 60 кун давомида бепул бўлади
60 кунлик муддатдан сўнг Теҳрон навигация ва хавфсизлик хизматлари учун тўлов жорий этишни режалаштирмоқда.
Эрон АҚШ билан давом этаётган музокаралар доирасида Ҳормуз бўғозидан ўтувчи кемалар учун 60 кунлик имтиёзли тартиб жорий этишга рози бўлди. Бу давр мобайнида Теҳрон бўғоз орқали хавфсиз транзит хизматлари учун тўлов ундирмайди.
Бу ҳақда Fars ахборот агентлиги музокаралар жараёнидан хабардор манбага таяниб маълум қилди.
Қайд этилишича, Эрон ва АҚШ ўртасида ишлаб чиқилган ўзаро англашув меморандуми якуний таҳририда қатор муҳим ўзгартиришлар киритилган. Ҳужжатда Эрон ва Уммоннинг Ҳормуз бўғозидаги денгиз қатнови келажагини белгилашдаги ўрни алоҳида қайд этилган.
Шунингдек, бўғоз орқали ҳаракатланувчи кемалардан хавфсизлик, навигация ва бошқа хизматлар учун тўлов ундириш ҳуқуқи Эрон томони учун тан олингани айтилмоқда.
Манбага кўра, кемалар учун бепул транзит режими фақат 60 кун амал қилади. Ушбу муддат якунлангач, Эрон бўғоздан фойдаланаётган тижорат кемаларига кўрсатиладиган хавфсизлик, навигация, экологик ва суғурта хизматлари учун тўлов жорий этишни режалаштирмоқда.
Эслатиб ўтамиз, аввалроқ, АҚШ ва Эрон ҳарбий ҳаракатларни тўхтатиш бўйича келишувга эришгани ҳақида хабар берилган эди.
