Самарқандда 3 ёшли бола боғча ҳудудидаги сув ҳавзасига тушиб кетиб вафот этди
Ҳозирда мазкур ҳолат бўйича туман прокуратураси томонидан терговга қадар суруштирув ишлари олиб борилмоқда.
Самарқанд вилоятининг Паяриқ туманида жойлашган нодавлат мактабгача таълим муассасасида 3 ёшли бола сув ҳавзасига тушиб кетиши оқибатида вафот этди. Бу ҳақда Самарқанд вилояти Мактабгача ва мактаб таълими бошқармаси хабар берди.
Маълум қилинишича, ҳодиса 2026 йил 5 июн куни Паяриқ тумани “Сарбазор” МФЙ ҳудудида жойлашган “Юлдузча” номли нодавлат боғчада содир бўлган. 2023-йилда туғилган P.M. боғча ҳудудида фавқулодда ҳолатларда фойдаланиш учун қурилган сув ҳавзасига тушиб кетган ва ҳаётдан кўз юмган.
Мазкур ҳолат юзасидан туман прокуратураси томонидан терговга қадар текширув ишлари олиб борилмоқда. Мутасадди идоралар марҳум боланинг оила аъзоларига ҳамдардлик билдирди.
Эслатиб ўтамиз, аввалроқ, Қашқадарёдаги хусусий боғчада уч ёшли бола автомобилда унутиб қолдирилиши оқибатида вафот этгани ҳақида хабар берилган эди.
