Сурхондарёда қарийб 38 кг гиёҳвандлик воситаси тўхтатиб қолинди
Ушбу гиёҳвандлик воситалари Афғонистондан олиб кирилган. 2 нафар гумонланувчи ўзидан “жонли контейнер” сифатида фойдаланган.
Сурхондарё вилоятида ўтказилган тезкор тадбирлар давомида Афғонистондан Ўзбекистонга контрабанда йўли билан олиб кирилган 37,6 килограммдан ортиқ гиёҳвандлик воситалари мусодара қилинди. Бу ҳақда Давлат хавфсизлик хизмати маълум қилди.
Қайд этилишича, ДХХнинг Сурхондарё вилояти бошқармаси ҳамда вилоят ИИБ ходимлари ҳамкорлигида ўтказилган тезкор тадбирда Афғонистондан 25 кг 444 грамм опий ва 11 кг 86 грамм гашиш олиб кирилгани аниқланган. Гиёҳвандлик воситаларини назорат остида Самарқанд шаҳрига етказиш жараёнида уларни қабул қилиб олаётган икки нафар маҳаллий ва икки нафар хорижлик фуқаро қўлга олинган.
Шунингдек, ДХХ, Чегара қўшинлари, ички ишлар ва божхона органлари ҳамкорлигида ўтказилган яна бир тадбирда Термиз халқаро савдо марказида 1 кг 76 грамм опийни 5 минг АҚШ долларига сотишга уринган икки нафар Афғонистон фуқароси ушланган.
Тергов давомида улар гиёҳвандлик воситаларини Ўзбекистонга яширин олиб киришда ўз таналаридан “жонли контейнер” сифатида фойдалангани аниқланган.
Мазкур ҳолатлар юзасидан Жиноят Кодексининг 246-моддаси 2-қисми ва 273-моддаси 5-қисми билан жиноят ишлари қўзғатилиб, “қамоқ” эҳтиёт чораси қўлланилди. Тергов ҳаракатлари олиб борилмоқда.
