Россия мактабларида араб тили ўқитилади
Таълим вазирлиги араб тилини ўқитиш дастурини тасдиқлади, дарслар 1 сентябрдан бошланади.
Россияда 2026/2027 ўқув йилидан бошлаб мактабларда араб тилини ўқитиш дастури жорий этилади. Бу ҳақда Россия таълим вазири Сергей Кравтсов Москва вилоятидаги Примаков номидаги гимназияда жойлашган Шайха Фотима бинт Муборак таълим марказига бағишланган йиғилишда маълум қилган.
Россия ҳукумати матбуот хизмати хабарига кўра, араб тилини ўқитиш бўйича дастур тасдиқланган бўлиб, у 2026 йил 1 сентябрдан кучга киради.
Йиғилишда Бирлашган Араб Амирликлари таълим вазири Сара бинт Юсеф ал-Амири ҳамда БААнинг Россиядаги фавқулодда ва мухтор элчиси Муҳаммад Аҳмад Алжабер иштирок этган. Томонлар икки давлат ўртасидаги таълим соҳасидаги ҳамкорлик ва Шайха Фотима бинт Муборак таълим маркази фаолиятини муҳокама қилган.
Сергей Кравтсовнинг таъкидлашича, Россияда уч йилдан буён араб тили бўйича олимпиада ўтказиб келинмоқда. Шунингдек, марказ фаолияти доирасида рус халқ эртаклари, Россия ҳақидаги китоблар ва рус адибларининг асарлари араб тилига таржима қилинган ҳамда БААга тақдим этилган.
Россия Таълим вазирлиги қайд этишича, мазкур ташаббус икки мамлакат ўртасидаги таълим ҳамкорлигини кенгайтириш, рус ва араб тилларини ривожлантириш ҳамда маданиятлараро мулоқотни мустаҳкамлашга хизмат қилади.
