18 ёшли қизни алдаб, Туркияга жўнатаётган жиноий гуруҳ ушланди
Улар қизларни юқори даромадли иш ваъдаси билан алдаб, хорижга жўнатиш билан шуғулланган.
Фарғона вилоятида одам савдоси билан боғлиқ жиноятнинг олди олинди. Бу ҳақда вилоят Ички ишлар бошқармаси маълум қилди.
Қайд этилишича, ИИБнинг уюшган жиноятчиликка қарши курашиш бошқармаси одам савдосига қарши кураш бўлими ходимлари томонидан ўтказилган тезкор тадбир давомида 18 ёшли қизни хорижга жўнатишга уринган жиноий гуруҳ фаолиятига чек қўйилган.
Дастлабки маълумотларга кўра, аввал Қува туманида яшаган, ҳозирда Туркиянинг Денизли шаҳрида истиқомат қилаётган аёл ҳамда унинг Фарғона шаҳрида яшовчи шериги олдиндан тил бириктириб, қизларни хорижга жўнатиш билан шуғулланиб келган.
Улар Фарғона шаҳрида яшовчи 2008 йилда туғилган қизни Туркияда юқори даромадли иш ваъдаси билан алдаб, хорижга олиб чиқишга уринган. Қиз таклифга рози бўлган, бироқ ҳуқуқни муҳофаза қилувчи органлар томонидан ўтказилган тезкор тадбир натижасида ушбу режага барҳам берилган.
Мазкур ҳолат юзасидан Жиноят кодексининг 135-моддаси (одам савдоси) билан жиноят иши қўзғатилган. Ҳозирда тергов ҳаракатлари давом этмоқда.
Ҳуқуқни муҳофаза қилувчи органлар фуқароларни хорижда юқори даромад ваъда қилувчи шубҳали таклифларга ишонмасликка чақирди.
