23 июнь футбол ўйини муносабати билан Тошкент метроси иш вақти узайтирилади
Мухлислар оқими ошиши сабаб метрода қўшимча иш режими жорий этилди.
Маълумки, футбол бўйича Ўзбекистон миллий терма жамоаси Жаҳон чемпионати доирасидаги навбатдаги муҳим учрашувини 23 июнь куни соат 22:00 да ўтказади.
Мазкур ўйин муносабати билан пойтахтнинг турли ҳудудларида футбол ихлосмандларининг ҳаракати сезиларли даражада ошиши кутилмоқда. Йўловчиларга қўшимча қулайлик яратиш ҳамда жамоат транспорти хизматларининг узлуксизлигини таъминлаш мақсадида “Тошкент метрополитени” ДУК томонидан метро поездлари ҳаракати вақти қўшимча 1 соатга узайтирилади.
Шунга кўра, 23 июнь куни метро йўловчиларга тунги соат 01:00 га қадар хизмат кўрсатади. Ушбу қўшимча иш режими мухлисларнинг ўйиндан сўнг ўз манзилларига хавфсиз, қулай ва тезкор етиб боришларини таъминлашга хизмат қилади.
