МБ мижозлардан энг кўп шикоят тушган 10 та банкни эълон қилди

Марказий банк 2026 йил I чораги якунлари бўйича мурожаатлар бўйича энг салбий кўрсаткич қайд этилган 10 та банк рейтингини эълон қилди. Рейтингдан ўрин олган банкларнинг ярми давлатга қарашли.

 

Рейтингда мижозлардан энг кўп шикоят тушган банк сифатида “Бизнесни ривожлантириш банки" қайд этилган. Ундан кейинги ўринларни “Анорбанк”, “Микрокредитбанк”, “АVО банк” ва “ТBC банк” эгаллаган.

 

Шунингдек, рўйхатдан қуйидаги банклар ҳам ўрин олган:

 

• “Давр банк”;
• “Тенге банк”;
• “Асака банк”;
• “Турон банк”;
• “Агробанк”.

 

 

Регулятор маълум қилишича, рейтинг истеъмолчилар ҳуқуқларини ҳимоя қилиш ва банк хизматлари сифатини ошириш мақсадида тузилган. Рўйхат Марказий банк ва бошқа давлат идораларига банклар фаолияти юзасидан келиб тушган мурожаатлар асосида шакллантирилади.

 

Қайд этилишича, мижозлар сонига нисбатан мурожаатлар улушининг юқори бўлиши банк маҳсулотлари ва хизматлари бўйича мижозларга етарли тушунтириш берилмаслиги, мурожаатларга ўз вақтида ва сифатли жавоб тақдим этилмаслиги, такрорий шикоятларга сабаб бўлаётган тизимли камчиликларнинг сақланиб қолиши, масофавий хизматлар, тўловлар, кредитлар ва бошқа банк операциялари билан боғлиқ муаммоларнинг ўз вақтида ҳал этилмаслиги ҳамда истеъмолчилар ҳуқуқлари ва қонуний манфаатларини ҳимоя қилиш бўйича ички назорат механизмларини янада такомиллаштириш зарурлигини кўрсатади.

 

Марказий банк мазкур банкларга мурожаатлар келиб чиқиш сабабларини чуқур таҳлил қилишни ва такрорий шикоятларга олиб келаётган омилларни бартараф этишни тавсия қилган. 

 

Шунингдек, мурожаатларни кўриб чиқиш жараёнларини такомиллаштириш, мижозларга хизмат кўрсатиш сифати ва ички назорат механизмларини кучайтириш зарурлиги кўрсатилган. Шу билан бирга, истеъмолчилар ҳуқуқларини ҳимоя қилишга қаратилган профилактик чораларни кенгайтириш тавсия этилган.

 

Марказий банкга кўра, мазкур индекс банкнинг молиявий барқарорлиги ёки ишончлилигини баҳоламайди. У фақат мижозлар сонига нисбатан келиб тушган мурожаатлар улушини акс эттиради. Чорак давомида 100 тадан кам мурожаат келиб тушган банклар бўйича индекс ҳисобланмайди.

 

Аввалроқ банкоматда нақд пул ечишдаги узилишлар, носозликлар учун банклар жаримага тортилиши ҳақида хабар берилганди.