Ўзбекистонда 464 та “заправка” фаолияти вақтинча тўхтатилди

 

Ўзбекистонда ёнилғи қуйиш шохобчалари ва газ тўлдириш иншоотларида хавфсизлик талабларига риоя этилиши ҳолати бўйича ўтказилган кенг қамровли хатлов якунида 464 та шохобча фаолияти вақтинча тўхтатилди. Бу ҳақда 22 июндан кучга кирган Вазирлар Маҳкамасининг қарорида маълум қилинди.

 

Қарорга кўра, республика бўйлаб фаолият юритаётган 6 196 та суюлтирилган ва сиқилган газ, нефть маҳсулотлари қуйиш шохобчалари ҳамда газ баллонларига суюлтирилган газ тўлдириш станция ва пунктлари текширувдан ўтказилган. Хатлов давомида авария ва нохуш ҳодисаларнинг олдини олиш, инсонлар хавфсизлигини таъминлаш ҳамда меҳнат муҳофазаси талабларига риоя этилиши ҳолати ўрганилган.

 

Текширувлар натижасида жами 46 минг 737 та қоидабузарлик ва камчилик аниқланган. Шундан 2 218 таси қурилиш, 7 949 таси ёнғин хавфсизлиги, 25 341 таси саноат ва техника хавфсизлиги, 3 354 таси техник жиҳатдан тартибга солиш ҳамда 7 875 таси технологик жараёнларга оид камчиликларни ташкил этган.

 

Хатлов жараёнида 7 минг 166 та камчилик жойида бартараф этилган бўлса, хавфсизлик талабларига жавоб бермаган 464 та ёнилғи қуйиш шохобчаси фаолияти вақтинча тўхтатилган.

 

Шунингдек, 2026 йил 1 сентябрдан бошлаб барча турдаги ёнилғи қуйиш шохобчалари ва газ тўлдириш иншоотларида хизмат муддати тугаган ёки ишлаб чиқарилган санаси номаълум бўлган, ортиқча босим остида ишловчи ускуналардан фойдаланиш 2030 йил 1 январгача чекланади.

 

Бундан ташқари, 2026 йил центабрига қадар инсонлар ҳаёти ва соғлиғига хавф туғдирувчи, ёнғин ва саноат хавфсизлиги ҳамда шаҳарсозлик меъёрларига жавоб бермайдиган объектлар реестри шакллантирилиб, уларни босқичма-босқич хавфсиз ҳудудларга кўчириш бўйича чора-тадбирлар ишлаб чиқилади.

 

Эслатиб ўтамиз, аввалроқ Қарши шаҳридаги ёқилғи қуйиш шохобчасида содир бўлган портлаш оқибатида 6 киши ҳалок бўлганди.