Жанубий Кореянинг собиқ адлия вазири 25 йилга қамалди
Вазир давлат тўнтаришини уюштиришда муҳим роль ўйнаганликда айбдор деб топилган.
Жанубий Кореянинг собиқ адлия вазири Пак Сон Же давлат тўнтаришига уринишда иштирок этгани учун 25 йил муддатга озодликдан маҳрум этилди. Бу ҳақда Yonhap ахборот агентлиги хабар берди.
Суд қарорига кўра, у 2024 йил 3 декабрда ҳарбий ҳолат жорий этишга уриниш билан боғлиқ воқеаларда иштирок этган ва исён деб таснифланган ҳаракатларни тайёрлаш ҳамда амалга оширишда муҳим роль ўйнаган.
Шунингдек, собиқ вазир мансаб ваколатини суиистеъмол қилишда ҳам айбдор деб топилган.
Прокуратура томонидан унга нисбатан 20 йил қамоқ жазоси сўралган бўлсада, суд 25 йил муддатни белгилаган.
Эслатиб ўтамиз, 2024 йил декабрь воқеалари билан боғлиқ иш доирасида Жанубий Кореянинг собиқ президенти Юн Сок Ёл ҳам айбланиб, кейинчалик умрбод қамоқ жазосига ҳукм қилинган.
3 декабрь куни эълон қилинган ҳарбий ҳолат фармони Миллий Ассамблея томонидан бекор қилинганидан сўнг воқеалар кескин сиёсий инқирозга сабаб бўлган. 2025 йил 4 апрелда Конституциявий суд импичментни тасдиқлаган.
Муддатидан олдинги сайловларда эса мухолифатдаги Демократик партия номзоди Ли Чже Мён ғалаба қозониб, 2025 йил 4 июндан давлат раҳбари лавозимини эгаллаган.
