Конгода номаълум касалликдан 14 киши вафот этди
Касаллик аломатлари пайдо бўлгач, ўлим 24 соат ичида қайд этилмоқда.
Конго Демократик Республикасининг ғарбий қисмида келиб чиқиши номаълум бўлган касаллик 19 кун ичида 14 кишининг ҳаётига зомин бўлди. Бу ҳақда маҳаллий депутат Жак Илунгу Опени маълум қилди.
Маълумотларга кўра, Квилу провинциясидаги Моколо-Биала қишлоғида июнь ойининг бошидан буён номаълум касаллик ҳолатлари қайд этилиб, ҳудуд аҳолиси орасида хавотирли вазият юзага келган.
Депутатнинг таъкидлашича, қишлоқда касаллик тез тарқалаётгани сабабли аҳоли сони камайиб бормоқда. У марказий ҳукумат ва соғлиқни сақлаш органларини зудлик билан вазиятга аралашишга ва касалликнинг табиатини аниқлашга чақирган.
Касаллик белгилари сифатида кучли бош оғриғи, қорин ва тизза оғриғи ҳамда қайт қилиш ҳолатлари қайд этилган. Беморлар касаллик жуда тез ривожланишини, ўлим эса дастлабки аломатлардан сўнг 24 соат ичида юз бераётганини билдиришган.
Ҳозирда маҳаллий мутахассислар томонидан намуналар тўпланиб, лаборатория шароитида текширув ишлари олиб борилмоқда.
