Ёмғирда хизмат қилаётган ЙПХ ходимига соябон берган ҳайдовчи рағбатлантирилди
Ҳайдовчи ЙПХ ходимига кўрсатган ёрдами ортида шахсий манфаат бўлмаганини билдирган.
Аввалроқ ижтимоий тармоқларда ёмғирли об-ҳаво шароитида хизмат олиб бораётган йўл-патруль хизмати ходимига ҳайдовчилардан бири томонидан соябон олиб бориб берилгани акс этган видео тарқалган эди.
Мазкур ҳолатга бефарқ бўлмаган, хизмат вазифасини бажараётган ходимга инсонийлик нуқтаи назаридан ёрдам кўрсатган фуқаро Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати томонидан рағбатлантирилди. Бу ҳақда ЙҲХХ Ахборот хизмати раҳбари Зойир Йўлдошов маълум қилди.
Тақдирлаш маросимида ҳайдовчи йўл-патруль хизмати ходимини танимаслигини, ўртада ҳеч қандай қоидабузарлик ёки манфаатдорлик бўлмаганини таъкидлаган.
“Шунчаки инсонийлик нуқтаи назаридан ёрдам бермоқчи бўлдим. Биз ички ишлар органлари ходимларининг меҳнатини қадрлаймиз ва ҳурмат қиламиз. Ҳар ким ҳам бу масъулиятли касб эгаси бўла олмайди. Яхшиям, сизлар борсизлар. Ҳамиша юзингиз ёруғ бўлсин”, — деган ҳайдовчи.
Йўл ҳаракати хавфсизлиги хизмати томонидан фуқарога эсдалик совғаси сифатида соябон топширилган.
