Кореяга ишга юборишни ваъда қилган фирибгарлар аниқланди

Бош прокуратура ҳузуридаги Департаментнинг ҳудудий бўлинмалари томонидан ўтказилган текширувларда фуқароларни Жанубий Кореяга ишга юборишни ваъда қилиб, улардан катта миқдорда пул ундирган бир қатор шахсларнинг ноқонуний ҳаракатлари фош этилди.

 

Аниқланишича, Тошкент вилоятида фуқаро Т.Т. 12 нафар фуқаронинг ишончига кириб, уларни Кореяга ишга жўнатишни ваъда қилган ҳамда 38 минг АҚШ долларини қўлга киритган. Тергов материалларига кўра, ушбу маблағлар аввал Миграция агентлигида ишлаган, фирибгарлик ва пора бериш билан боғлиқ жиноятлар учун судланган А.А.га берилган.

 

Марғилонда ўтказилган текширувда эса муқаддам судланган фуқаро И.Р. икки нафар фуқарони Кореяга ишга юборишни ваъда қилиб, улардан жами 3,5 минг АҚШ долларини олгани аниқланган. Мазкур маблағнинг 3 миллион сўми жабрланувчиларга қайтарилган.

 

Қашқадарё вилоятининг Деҳқонобод туманида фуқаролар И.Х. ва А.К. Миграция агентлигида ишловчи танишлари орқали бир фуқарони Кореяга ишга юборишни ваъда қилиб, ундан 2 минг АҚШ доллари ва 36 миллион сўм олганликда гумон қилинмоқда.

 

Хонобод шаҳрида муқаддам фирибгарлик учун судланган А.А. уч нафар фуқарога Корея визасини олиб беришни ваъда қилиб, 2,5 минг АҚШ доллари ва 11 миллион сўмни қўлга киритгани аниқланган. Тергов давомида ушбу маблағнинг 1 минг АҚШ доллари қайтарилган.

 

Жиззах вилоятининг Дўстлик туманида муқаддам судланган фуқаро Ю.Л. бир фуқарони Кореяга ишга юборишни ваъда қилиб, 11 минг АҚШ доллари эвазига келишган ва шундан 2,3 минг АҚШ долларини олган.

 

Хоразм вилоятининг Боғот туманида эса фуқаро Х.К. Кореяда ишлаш учун топшириладиган имтиҳондан ижобий натижа билан ўтказиб беришни ваъда қилиб, 3,5 минг АҚШ долларидан 1 минг АҚШ долларини олгани аниқланган.

 

Мазкур ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.