Тошкентда қалбаки 10 минг долларни 6,5 минг долларга сотаётган шахс ушланди
Тезкор тадбир давомида қалбаки валюталар мусодара қилинган.
Бош прокуратура ҳузуридаги Департаментнинг Тошкент шаҳар бошқармаси ҳамда бошқа ҳуқуқни муҳофаза қилувчи органлар ходимлари ҳамкорлигида ўтказилган тезкор тадбир давомида қалбаки АҚШ долларларини муомалага киритишга уринган шахс қўлга олинди. Бу ҳақда Департамент матбуот хизмати хабар берди.
Аниқланишича, фуқаро A.A. 100 долларлик купюралардаги қалбаки 10 минг АҚШ долларини фуқаро Р.З.га 6,5 минг АҚШ долларига сотаётган вақтида ашёвий далиллар билан ушланган. Тезкор тадбир давомида қалбаки валюталар мусодара қилинган.
Мазкур ҳолат юзасидан Жиноят кодексининг 176-моддаси — қалбаки пул, актсиз маркаси ёки қимматли қоғозлар ясаш ҳамда уларни ўтказиш билан боғлиқ жиноят аломатлари бўйича жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, аввалроқ Наманган вилоятида ҳам қалбаки 100 минг АҚШ долларини 40 минг долларга сотишга уринган шахслар ҳуқуқни муҳофаза қилувчи органлар томонидан қўлга олиниб, уларга нисбатан тегишли тартибда жиноят иши қўзғатилгани ҳақида хабар қилинганди.
