Малайзияда 3 нафар ўзбекистонлик ўлимга ҳукм қилинди
Улар ўзлари билмаган ҳолда наркокурерлик қилган. Мамлакатга саёҳат учун борган аёлларнинг чемоданидан синтетик наркотиклар топилган.
Малайзияда бир неча йил аввал гиёҳванд моддалар контрабандаси билан боғлиқ жиноятда айбланган уч нафар Ўзбекистон фуқароси ўлим жазосига ҳукм қилинган. Бу ҳақда Давлат хавфсизлик хизматининг истеъфодаги ходими Ўктам Сувонов маълум қилди.
Унинг сўзларига кўра, 56 ва 54 ёшли икки аёл ҳамда уларнинг бир таниши Куала-Лумпур аэропортида йирик миқдордаги гиёҳванд моддалар билан қўлга олинган. Кейинчалик Малайзия суди уларга нисбатан ўлим жазоси тайинлаган.
Сувоновнинг айтишича, воқеа аёллардан бирининг қизи чет эл фуқаросига турмушга чиққач, онасини Малайзияга бепул саёҳатга таклиф қилиши билан бошланган. Аёл сафарга узоқ йиллардан буён ногирон қизини парваришлаб келаётган қўшниси ва яна бир танишини ҳам таклиф қилган.
Маълум қилинишича, парвоз олдидан нотаниш шахс уларга бўш чемоданларни топширган. Куала-Лумпурга етиб борганларида эса уларни ҳеч ким кутиб олмаган. Шундан сўнг аэропорт хавфсизлик хизмати ходимлари томонидан текширув ўтказилган.
Текширув давомида ҳар бир чемодандан тўрт килограммдан метамфетамин аниқланган. Сувоновнинг таъкидлашича, аёллар ўзлари билмаган ҳолда наркокурер сифатида фойдаланилган бўлиши мумкин.
Истеъфодаги ДХХ ходими кейинчалик Малайзияга бориб, қамоқхонада аёллар билан учрашганини ҳам айтди. Унинг сўзларига кўра, маҳкумалардан бири учрашув чоғида:
“Сиз, эҳтимол, ҳаётимда кўриб турган энг сўнгги ватандошимсиз”, деган.
Ўктам Сувонов мазкур иш бўйича чиқарилган ўлим жазоси ижро этилган ёки этилмагани ҳақида маълумот бермади.
