АҚШ Венесуэладаги зилзила оқибатларини бартараф этиш учун 150 млн доллар ажратади
Маблағ фавқулодда қидирув-қутқарув ишлари, ҳаво транспорти орқали ёрдам етказиш ҳамда гуманитар операцияларни мувофиқлаштиришга йўналтирилади.
АҚШ маъмурияти Венесуэлада юз берган вайронкор зилзилалар оқибатларини бартараф этиш ишлари учун 150 миллион доллар миқдорида гуманитар ёрдам ажратишини маълум қилди.
АҚШ Давлат департаменти берган баёнотга кўра, ажратилаётган маблағ фавқулодда қидирув-қутқарув ишлари, ҳаво транспорти орқали ёрдам етказиш ҳамда гуманитар операцияларни мувофиқлаштиришга йўналтирилади.
Маълум қилинишича, ёрдам пакетининг 50 миллион доллари Венесуэладаги ҳамкор ташкилотларга, 100 миллион доллари эса БМТнинг Гуманитар масалаларни мувофиқлаштириш бошқармаси (ОЧА) орқали тақдим этилади.
Эслатиб ўтамиз, 25–26 июнь кунлари Венесуэлада кетма-кет 7,2, 7,5 ва 4,5 магнитудали зилзилалар содир бўлган эди. Табиий офатдан мамлакатнинг шимолидаги Ла Гуайра штати энг кўп зарар кўрди ва ҳудуд фавқулодда фалокат зонаси деб эълон қилинган.
Ҳозирда қутқарув хизматлари вайроналар остида қолганларни қидириш, жабрланганларга ёрдам кўрсатиш ҳамда инфратузилмага етказилган зарарни баҳолаш ишларини давом эттирмоқда.
Эслатиб ўтамиз, сўнгги расмий маълумотларга кўра, Венесуэладаги кучли зилзилалар оқибатида 235 киши ҳалок бўлган, 4 300 нафардан ортиқ фуқаро жароҳат олган.
