Испанияда жазирама оқибатида тўрт кунда 200 дан ортиқ киши вафот этди
Мамлакатда қизил хавф даражаси эълон қилинган.
Испанияда аномал иссиқ тўлқини оқибатида сўнгги тўрт кун ичида камида 212 киши вафот этди.
Маҳаллий соғлиқни сақлаш идоралари маълумотларига кўра, 21–24 июнь кунлари кузатилган кескин иссиқ ҳаво ўлим ҳолатларининг сезиларли даражада ошишига сабаб бўлган. Бу ҳақда АFP хабар берди.
Ҳозирда Испания, Франция ҳамда Марказий ва Ғарбий Европанинг қатор давлатларида аномал иссиқ сабаб энг юқори — қизил хавф даражаси эълон қилинган.
Францияда ҳам вазият мураккаблигича қолмоқда. Юқори ҳарорат туфайли дарёлар суви меъёрдан ортиқ исиб кетгани сабаб айрим атом электр станцияларининг фаолияти вақтинча тўхтатилган. Шунингдек, жазирамадан қочиш мақсадида сув ҳавзаларига кирган 40 нафардан ортиқ киши чўкиб ҳалок бўлгани маълум қилинган эди.
Мутахассисларнинг таъкидлашича, экстремал иссиқ, айниқса, кексалар ва сурункали касалликларга чалинган фуқаролар учун жиддий хавф туғдиради. Иссиқ уриши, сувсизланиш ҳамда юрак-қон томир касалликлари оқибатида ўлим хавфи ҳароратнинг меъёрдан ҳар бир қўшимча даражага ошиши билан тахминан 9–10 фоизга ортади.
Маълумот учун, Испанияда 2025 йилда май–сентябрь ойларидаги жазирама оқибатида 3 832 киши вафот этган. Мамлакатда энг юқори кўрсаткич эса 2022 йилда қайд этилган бўлиб, ўшанда аномал иссиқ сабаб 4 789 киши ҳаётдан кўз юмган. Сўнгги ўн йил давомида эса экстремал ҳароратлар оқибатида жами 27 564 нафар фуқаро вафот этган.
