Жанубий Корея собиқ президенти учун ўлим жазоси сўралди
Юн Сок Ёл иши бўйича апелляция судида прокуратура умрбод қамоқни етарли эмас деб ҳисобламоқда.
Жанубий Корея махсус прокуратураси собиқ президент Юн Сок Ёлга нисбатан қўзғолон айблови бўйича кўрилаётган апелляция ишида яна ўлим жазосини талаб қилди.
Yonhap хабарига кўра, махсус прокурор бошчилигидаги тергов гуруҳи Сеул Олий судига тегишли илтимосномани тақдим этган.
Прокуратура аввалги инстанция томонидан чиқарилган умрбод қамоқ жазоси содир этилган жиноят оғирлигига мос эмаслигини таъкидлаб, суддан энг оғир жазони қўллашни сўрамоқда. Шунингдек, улар қуйи суд томонидан ҳарбий ҳолат жорий этишга тайёргарлик бўйича муҳим далиллардан бири сифатида баҳоланган собиқ ҳарбий хизматчи Но Санг-воннинг ёзувлари рад этилганига ҳам эътироз билдирган.
Эслатиб ўтамиз, 2024 йил 3 декабрь куни Юн Сок Ёл Шимолий Кореядан келаётган таҳдидни асос қилиб, мамлакатда ҳарбий ҳолат эълон қилган эди. Бироқ унинг мурожаатидан тахминан 150 дақиқа ўтиб, Миллий ассамблея ҳарбий ҳолатни бекор қилиш учун овоз берган. Орадан кўп ўтмай собиқ президент ҳибсга олинган.
2026 йил февраль ойида суд Юн Сок Ёлни парламент ҳудудига ҳарбийларни юбориш орқали Миллий ассамблея фаолиятига ноқонуний аралашишга уринган, деб топиб, уни умрбод озодликдан маҳрум этиш жазосига ҳукм қилган эди. Эндиликда мазкур иш апелляция инстанциясида кўриб чиқилмоқда.
