Хатирчида 6 ойлик ўғлининг оғзига пайпоқ тиқиб ўлдирган ота 15 йилга қамалди

Навоий вилоятида йиғлаётган чақалоғига тан жароҳати етказиб, унинг ўлимига сабаб бўлган эркакка суд ҳукми ўқилди. Zamon.uz суд ҳужжати билан танишди.

 

Жиноят ишлари бўйича Хатирчи туман суди томонидан кўриб чиқилган жиноят ишига кўра, ҳодиса 2026 йил 9 январь куни тумандаги "Дамариқ" маҳалласида содир бўлган.

 

Суд ҳукмида қайд этилишича, 1993 йилда туғилган Ф.Н. уйига келган вақтида 2025 йил 20 июлда туғилган ўғли йиғлаб, тинчланмаётганидан жаҳли чиққан. Эркак аввал чақалоқни силкитган, сўнг унинг оғзига болалар пайпоғини тиқиб, жисмоний азоб берган.

 

Суд материалларига кўра, эркак турмуш ўртоғи ва бошқа оила аъзоларининг эътирозларига қарамай, чақалоқни икки қўлидан ушлаб кўтарган ва қўйиб юборган. Натижада боланинг боши диваннинг пастки қисмидаги ёғоч қисмига урилган. Шундан сўнг у яна шу ҳаракатни такрорлаган.

 

Ҳукмда қайд этилишича, боланинг аҳволи оғирлашгач, у Хатирчи туман марказий шифохонасига клиник ўлим ҳолатида олиб борилган. Шифокорлар кўрсатган тиббий ёрдамга қарамай, чақалоқ 2026 йил 14 январь куни вафот этган.

 

Суд-тиббий экспертиза хулосасига кўра, боланинг ўлимига бош мия қаттиқ ва юмшоқ пардалари остига ҳамда миячага қон қуйилиши, мия ва ўпкалар шиши ҳамда ўткир нафас етишмовчилиги сабаб бўлган. Экспертиза танада энса, елка, тизза ва бошқа соҳаларда тан жароҳатлари мавжудлигини ҳам аниқлаган.

 

Суд мажлисида судланувчи ўз айбига иқрор бўлмаган ва фарзандини қасддан ўлдирмаганини билдирган. Бироқ суд унинг айби жабрланувчининг, гувоҳларнинг кўрсатмалари, суд-тиббий экспертиза хулосаси ҳамда иш бўйича тўпланган бошқа далиллар билан тўлиқ исботланган деган хулосага келган.

 

Суд Ф.Н.ни Ўзбекистон Республикаси Жиноят кодексининг 97-моддаси 2-қисми "в", "ж" бандларида назарда тутилган жиноятни содир этганликда айбдор деб топди ва унга 15 йил муддатга озодликдан маҳрум қилиш жазосини тайинлади. Жазони умумий тартибли колонияда ўташи белгиланди.