Бухорода 17 ёшли йигит каналда чўкиб ҳалок бўлди
Марҳумнинг жасади қидирув ишлари натижасида бир кундан сўнг сувдан олиб чиқилган.
Бухоро вилоятининг Когон туманида каналда чўмилаётган 17 ёшли фуқаро сувга чўкиб ҳалок бўлди. Бу ҳақда вилоят Фавқулодда вазиятлар бошқармаси маълум қилди.
Қайд этилишича, 27 июнь куни соат 14:50 да «112» тизими орқали 2009 йилда туғилган фуқаронинг Когон тумани «Сорғун» МФЙ ҳудудидан оқиб ўтувчи Шоҳруд каналида чўмилиш вақтида сувга чўкиб кетгани ҳақида хабар келиб тушган.
Маълумотларга кўра, ҳодиса кенглиги 18–20 метр, чуқурлиги эса 7–8 метр бўлган каналда содир бўлган.
Воқеа жойида Бухоро вилояти Фавқулодда вазиятлар бошқармаси қутқарувчилари ҳамда маҳаллий фуқаролар иштирокида қидирув-қутқарув ишлари олиб борилган. Натижада марҳумнинг жасади 28 июнь куни соат 16:40 да топилиб, сувдан олиб чиқилган.
Ҳозирда ҳодиса юзасидан тегишли ташкилотлар томонидан терговга қадар текширув ишлари олиб борилмоқда.
Эслатиб ўтамиз, аввалроқ Тошкент вилоятининг Бўстонлиқ туманида ҳам икки нафар бола каналга тушиб кетиши оқибатида ҳалок бўлгани ҳақида хабар берилганди.
