Милтиқ, патрон ва ўқлар божхона чегарасидан ўта олмади
“Навоий” чегара божхона постида қурол ва патронларни ноқонуний олиб киришга бўлган икки ҳолат фош этилди.
Давлат божхона хизмати ходимлари томонидан ўтказилган божхона назорати давомида мамлакат ҳудудига қурол ва ўқ-дориларни ноқонуний олиб киришга бўлган икки ҳолат аниқланди. Бу ҳақда вилоят божхона бошқармаси матбуот хизмати хабар берди.
Маълум қилинишича, «Навоий» чегара божхона пости орқали пиёда кириб келган фуқаронинг қўл юки текширилганда, оғзаки сўровда маълум қилинмаган ҳамда йўловчи божхона декларациясида қайд этилмаган 1 дона “KRAL ARMS” русумли милтиқ ва 44 дона “SPOTXON” русумли ўқ борлиги аниқланган.
Яна бир ҳолатда эса бошқа бир йўловчининг қўл юклари божхона кўригидан ўтказилганда, декларацияда кўрсатилмаган 1 дона “RETAY G19C” русумли тўппонча ҳамда 30 дона “Kaiser” русумли патрон борлиги фош этилган.
Ҳозирда ҳар икки ҳолат юзасидан тегишли тартибда суриштирув ишлари олиб борилмоқда.
Эслатиб ўтамиз, аввалроқ «Навоий» чегара божхона постида йўлбарссимон бўғма илонни Ўзбекистон ҳудудига ноқонуний олиб киришга уриниш фош этилгани хабар қилинган эди.
