Саудия Арабистони Футбол Федерацияси президенти истеъфога чиқди
Саудия терма жамоаси гуруҳ босқичида 2 очко билан сўнгги ўринни эгаллаб, плей-оффга чиқа олмади.
Саудия Арабистони Футбол Федерацияси президенти Ёсир Ал-Мишал миллий терма жамоанинг 2026 йилги ФИФА Жаҳон чемпионатидаги муваффақиятсиз иштироки ортидан лавозимини тарк этишини маълум қилди. Бу ҳақда Reuters хабар берди.
Ал-Мишал баёнотида федерация раҳбарияти Саудия футболини ривожлантириш ва мухлислар кутган натижаларга эришиш учун барча имкониятларни ишга солганини, бироқ терма жамоанинг плей-офф босқичига чиқа олмагани умумий мақсадларга мос келмаслигини таъкидлаган.
“Миллий терма жамоанинг Жаҳон чемпионатининг кейинги босқичига чиқа олмагани бизнинг умумий амбицияларимизга мос келмайди. Бунинг учун тўлиқ жавобгарликни ўз зиммамга оламан ва мухлислардан узр сўрайман”, — деган Ал-Мишал.
Унинг сўзларига кўра, масъулият янги босқич учун имконият яратишни талаб қилади. Шу сабабли у амалдаги ваколат муддати якунланишини кутмасдан лавозимини тарк этишга қарор қилган. Эндиликда амалдаги тартиб-қоидаларга мувофиқ, Саудия Арабистони Футбол Федерациясининг янги раҳбариятини сайлаш жараёни бошланади.
Ёсир Ал-Мишал лавозимини тарк этаётган бўлсада, Саудия спортини ривожлантириш йўлида фаолиятини давом эттиришини билдириб, футбол жамоатчилиги ва мухлисларга қўллаб-қувватлагани учун миннатдорлик изҳор қилган.
Маълумот учун, Саудия Арабистони терма жамоаси 2026 йилги Жаҳон чемпионати гуруҳ босқичида 2 очко жамғариб, ўз гуруҳида сўнгги ўринни эгаллади ва плей-офф йўлланмасини қўлга кирита олмади.
Эслатиб ўтамиз, аввалроқ Жанубий Корея миллий терма жамоаси бош мураббийи 2026 йилги FIFА Жаҳон чемпионатида жамоа муваффақиятсиз иштирок этгани ортидан лавозимини тарк этиши ҳақида хабар берилган эди.
