Қашқадарёда вояга етмаган қиз тўрт эркак томонидан зўрлангани айтилмоқда
Ижтимоий ҳимоя миллий агентлиги ҳолат назоратга олинганини билдириб, жабрланувчига психологик, онасига эса юридик ёрдам кўрсатилганини маълум қилди.
ИИВ матбуот котиби Шоҳрух Ғиёсов Қашқадарё вилоятида вояга етмаган қиз тўрт эркак томонидан зўрланганини тасдиқлади, дея хабар бермоқда Nemolchi.uz.
Маълум қилинишича, 2026 йил 7 июнь куни Қашқадарё вилоятининг Яккабоғ туманида Ш.Х. (23 ёш), Д.Х. (22), О.Н. (20) ва Д.А. (21) 14 ёшли қизни Damas русумли автомашинага миндириб, далага олиб бориб, зўрлаган.
Яккабоғ тумани ИИБ ҳузуридаги тергов-тезкор гуруҳи воқеа жойини кўздан кечириб, иш учун аҳамиятли бўлган ашё ва далилларни олган. Судга оид тиббий, биологик ва психологик экспертизалар тайинланган.
8 июнь куни ҳолат юзасидан Жиноят кодексининг 128-моддаси 1-қисми билан жиноят иши қўзғатилган. 29 июнь куни эса иш Жиноят кодексининг 118-моддаси 3-қисми "а" бандига қайта малакаланиб, гумонланувчиларга айблов эълон қилинган ва улар процессуал тартибда ушланган.
Қайд этилишича, мазкур жиноят иши Тергов департаменти томонидан назоратга олинган бўлиб, дастлабки тергов якуни бўйича барча айбдор шахсларга қонуний чора кўрилиши таъминланади.
Шунингдек, Ижтимоий ҳимоя миллий агентлиги мазкур ҳолатни назоратга олганини маълум қилди. Агентликка кўра, жабрланувчига психологик, унинг онасига эса юридик ёрдам кўрсатилган.
Жабрланувчи билан ишлаш мақсадида маҳалладаги ижтимоий ходим ҳамда Яккабоғ тумани “Инсон” ижтимоий хизматлари маркази Болаларни ижтимоий ҳимоя қилиш бўлими мутахассислари томонидан индивидуал ижтимоий кузатув ("кейс") очилиб, дастлабки баҳолаш ишлари ўтказилган.
